05:30 Дар ҷаҳон “ҳафтгонаи бузурги қарздор” пайдо шуд. | |
 Дар ҳафт иқтисоди бузурги ҷаҳон дар шароити баланд будани фоизҳо бори қарз аз ҳад зиёд афзудааст. Ин боиси хатари “доминои девалватсия” шудааст. Дар ин бора “Foreign Policy” хабар дод. Ба гуфтаи тадқиқот, вазъ ба бӯҳронҳои молиявии солҳои 90-ум монанд аст, аммо “дар миқёси хеле бузургтар”. Ба иттилои Хазинаи Байналмилалии Пул, дар Канада, Фаронса, Япония, Испания, Италия, Британияи Кабир ва ИМА қарзи давлатӣ аз 100 фоизи ММД зиёд шудааст. Иқтисоддон Дэниэл Алтман онҳоро D7 – “ҳафтгонаи бузурги қарздор” номид. Ин ном бар асоси аналогия бо иттиҳоди ҷаҳонии G7 интихоб шуда, гурӯҳи кишварҳои бузургтарин қарздорони байналмилалиро ифода мекунад. “Чунин ҳодисаҳо метавонанд бидуни огоҳӣ оғоз шаванд ва бо суръати саргиҷкунанда шиддат гиранд”, - ҳушдор медиҳад коршинос. Ба назари ӯ, агар дар яке аз кишварҳои D7 девалватсия рух диҳад, ин тавассути “се механизми иқтисодӣ” ба дигарон низ паҳн мешавад. Аввалин – ин сиёсати классикии “вайрон кардани ҳамсоя” аст, ки дар он чораҳои зиддибӯҳронӣ дар як кишвар қабул мешаванд, аммо таъсири манфии он ба кишварҳои ҳамсоя ба назар гирифта намешавад. Дуюм – ба рафтори сармоягузорон вобаста аст, ки онҳо хатарҳоро аз нав арзёбӣ мекунанд ва портфелҳои худро бозбинӣ менамоянд. Масалан, агар доллари ИМА қадрсиз шавад, мудирони фондҳои сармоягузорӣ фурӯши дороиҳои Канадаро оғоз мекунанд. Сеюм – ба сохтори захираҳои асъории бонкҳои марказӣ марбут аст, ки қисме аз ин захираҳо бо асъори кишварҳои дигар ифода мешаванд. Аз ин рӯ, қадрсиз шудани яке аз онҳо ба таври худкор ҳаҷми умумии захираҳои асъориро коҳиш медиҳад. | |
|
| |
| Ҳамагӣ эзоҳҳо: 0 | |
