06:12 Дар Британия тӯтии гапзананда ба полис дар дастгир кардани наркосавдогарон кумак кард | |
Дар Британияи Кабир тӯтии гапзананда ба полис дар ошкор кардани фаъолияти наркобанда кумак кард. Дар ин бора “Daily Mail” хабар дод. Ин тӯтӣ бо лақаби “Манго” ба як шиноси саркардаи наркотиксавдогарон тааллуқ дошт. Ӯ ибораҳои дар савдои маводи мухаддир истифодашавандаро, аз ҷумла ибораи “ду дона барои 25” аз ёд карда буд. Полис дар шаҳри Блэкпул рейд анҷом дода, миқдори зиёди героин ва кокаинро мусодира кард. Дар баробари ин, онҳо тӯтиро низ пайдо карданд. Дар ҷараёни тафтишот маълум шуд, ки Адам Гарнетти 35-сола аз соли 2023 то 2024 аз зиндон тамоми шабакаи ҷиноиро идора кардааст. Дар телефони ӯ видеоҳое бо акси маводи мухаддир ва инчунин видеоҳое, ки тӯтӣ бо пулҳои аз маводи мухаддир бадастомада бозӣ мекунад ва ибораҳои махсусро мегӯяд, ёфт шуданд. Дар натиҷа, 15 нафар аъзои ин гурӯҳи ҷиноӣ ба додгоҳ кашида шуданд. Ба Гарнетт 19,5 соли зиндон илова карда шуд. Ба соҳиби тӯтӣ – шиноси Гарнетт – 12 соли зиндон дода шуд. Ду нафар шарик ба додгоҳ ҳозир нашуданд, бинобар ин нисбат ба онҳо кофтуков эълон гардид. Дар мавриди “ҷазо”-и тӯтӣ маълумот мавҷуд нест. Қобили зикр аст, ки дар ИМА низ чунин ҳолат рух дода буд. Тӯтии гапзананда сабаби ошкор шудани як парвандаи ҷиноӣ гардид. Соли 2015 як зан дар хонааш шавҳарашро тирборон карда кушт ва сипас кӯшиш кард, ки худро низ кушташуда нишон диҳад. Аммо тӯтӣ суханони гуфташударо аз ёд карда, ба муфаттишон далели муҳимро расонд. | |
|
| |
| Всего комментариев: 0 | |
